مقارنة Realme C21 مع Oppo A15 مع Samsung A02s – أفضل موبايل بـ 2000 جنية !

مقارنة Realme C21 مع Oppo A15 مع Samsung A02s – أفضل موبايل بـ 2000 جنية ! لو بتدور على موبايل تشتريه في حدود 2000 جنية .. فاحنا في موبيزل عملنا رحلة ميدانية مقارنة Realme C21 مع Oppo A15 مع Samsung A02s – أفضل موبايل بـ 2000 جنية ! 
في محلات الموبايلات واختارنا ليكم 3 موبايلات من 3 براندات مضمونة وهنعمل بينهم مقارنة علشان نقدر نعرف مين أفضل موبايل في حدود الـ 2000 جنية !

الـ 3 موبايلات هما .. Realme C21 الموبايل الجديد الي لسه نازل من ريلمي و Oppo A15 الي محقق مبيعات محترمة .. وأرخص موبايل مقبول من سامسونج Samsung Galaxy A02s .. في المقارنة دي هتعرف مين الأفضل 

التصميم :-

 

تصميم C21 و A02s قريبين اوي من بعض .. نفس نقشة الظهر المصنفره شوية اللي مش بيظهر فيها خرابيش ولا بصمات .. حتى هتلاقي نفس شكل المثلثات الي في الظهر .. اما A15 فالتصميم لامع شوية .. وده هيخلي الموبايل يتبهدل علطول.

بس خلي بالك ان Oppo A15 هو الوحيد اللي معاه جراب في العلبة اما C21 و A02s مفيش معاهم جراب .. وبالنسبة للبصمة فا هي مش موجودة للأسف في A02s.

سامسونج معوضاك عن البصمة بميكروفون اضافي لعزل الضوضاء .. وجوده في موبايل بالسعر ده ميزة طبعًا .. بس البصمة مهمة برده وانا شايف مينفعش موبايلك يكون من غير بصمة .. احنا في 2021 يعني.

 

لو ركزت برده هتلاقي ريلمي حطه السماعات في الظهر .. والمكان ده اتلغى يعني .. المفروض السماعة تبقى تحت جنب مدخل الشحن علشان ميكتمش .. ما علينا.

الـA15 أخفهم وزن وارفعهم لانه اقلهم في البطارية .. وبعديه يجي C21 واتقلهم A02s ولكن الفروقات مش كبيرة خالص.

 

 

 

الشاشة :-

 

الـ3 شاشات بحجم 6.5 بوصة والتلاته بدقة HD+ .. التلاته بنوتش .. طبعا شاشات اقتصادية جدا.

الفرق الجوهري ان شاشة C21 و A15 من نوع IPS LCD اما سامسونج A02s شاشته نوعها أقل PLS والشاشة بتاعت سامسونج مصفرة شويتين.

الـ3 شاشات هيدولك أداء متواضع من ناحية الألوان والتفاصيل .. ولكن ده الموجود عمومًا في فئة الـ2000 جنية .. شاشة الـA15 السطوع بتاعها اعلى شوية من سطوع ريلمي وسامسونج.

والـOppo A15 برده هو الوحيد اللي شاشته عليها سكرينه.

طبعًا الحافة السفلية كبيرة اوي في الـ3 موبايلات، حاجة اي حد ياخد باله منها .. ولكن عادي احنا بنتكلم في موبايلات اقتصادية.

الأداء :-

 

موبايل Realme C21 بيجي بمعالج ميدياتيك Helio G35 .. اما Oppo A15 بيجي بميدياتيك Helio P35 .. سامسونج A02s بيجي بمعالج سناب دراجون 450 .. احدث معالج فيهم واكبر معالج حقق رقم على انتوتو هو المعالج الموجود في C21.

سرعة القراءة والكتابة برده ريلمي C21 تفوق على A15 و A02s.

الـC21 والـA02s بـ4 جيجا رام انما الـA15 للأسف 3 جيجا رام بس.

 

اداء الـ3 موبايلات متواضع ولكن ريلمي كان بيتعامل اسرع شوية في المهام الأصعب .. واوبو وراه علاطول .. انما سامسونج كان ابطأ بشكل ملحوظ في معظم المهام اللي عملتها على الموبايل.

الاداء الرسومي .. ببجي بتشتغل على Balanced Medium على الـ3 موبايلات .. احسنهم في تشغيل اللعبة كان ريلمي C21 بفرق بسيط في نعومة اللعبة بفضل المعالج الأقوى بفرق بسيط .. ومفيش موبايل منهم بيسخن فا متقلقش.

عوامل الأمان وعناصر اخرى :-

بصمة C21 سريعه وتقدر تعتمد عليها .. بصمة A15 برده كويسة .. وزي ما قولتلك سامسونج A02s مفيهوش بصمة اصلا .. الفيس ان لوك مقبول في الـ3 موبايلات وكالعادة Galaxy A02s ابطأهم.

 

الـ3 موبايلات بيشتغلوا بـAndroid 10 مش 11 .. المعالجات اللي في الموبايلات دي معتقدش تستحمل اندرويد 11 .. ريلمي C21 و Galaxy A02s فيهم عمل نسختين من برامج التواصل .. انما اوبو A15 للأسف مفيهاش الميزة دي.

مستشعر التقارب موجود وشغال كويس في الـ3 موبايلات .. اما الجيروسكوب فهو مش موجود في سامسونج وموجود سوفت وير في ريلمي و اوبو.

 

اعلى صوت فيهم هو Oppo A15 بعديه Galaxy A02s واقل صوت هو Realme C21 .. هو الفروقات مش كبيرة على فكرة .. بس مشكلة C21 ان السماعة بتتكتم بسهولة عشان مكانها اللي في الظهر.

اما الشبكات .. الـOppo A15 والـRealme C21 ممتازين مفيهمش ولا غلطة .. اما Galaxy A02s يجي وراهم اقل منهم شوية.

البطارية :-

 

بطارية ريلمي C21 وجالاكسي A02s بحجم 5000 مللي امبير .. اما اوبو A15 بطاريته حجمها 4230 مللي امبير.

جربت استخدم الـ3 موبايلات بنفس السطوع ونفس الإستخدام، وصلت لإن بطارية A15 بقت 12% وقربت تخلص لأنها أقلهم اما A02s و C21 كانوا لسه 26% وده بيبين فرق قوة البطاريات في الإستخدام الفعلي.

الـGalaxy A02s هو الوحيد الـType C .. الباقي بمنفذ Micro USB 2.0 .. شاحن الـA02s بقدرة 7 واط اما شاحن C21 و A15 بقدرة 10 واط.

ولما جربت أشحنهم كلهم مع بعض أسرع واحد شحن هو الـA15 خلص في 3 ساعات إلا ربع، تاني واحد C21 بعديه بـ 6 دقائق تقريبًا .. اما A02s اتاخر عنهم أكثر من ربع ساعة علشان يشحن لـ100% بسبب الشاحن الأبطأ.

الكاميرات :-

 

الـ3 موبايلات بـ3 كاميرات في الظهر زي بعض .. الأساسية 13 ميجا بيكسل فتحة عدسة F/2.2 والتانية 2 ميجا بيكسل ماكرو والتالتة 2 ميجا بيكسل عزل .. والسيلفي ف الـ3 موبايلات 5 ميجا بيكسل برده.

 

اداء الكاميرات متواضع جدا في الـ 3 موبايلات لأننا بنتكلم في موبايلات اقتصادية ولكن كان في تفوق واضح لـ Realme C21 في التصوير بسبب الألوان الأفضل وعموما معالجة ريلمي كانت كويسة جدا للصور.

ريلمي تفوقت في التصوير في مختلف اوضاع التصوير سواء في الشمس او اضاءات داخلية او حتى اضاءات داخلية ضعيفة سواء في الكاميرا الامامية أو الخلفية.

المركز التاني في التصوير Oppo A15 وأقل كاميرا فيهم سواء خلفية أو امامية هو الـ Samsung A02s.

بالنسبة لتصوير الفيديوهات الـ 3 موبايلات أخرهم جودة 1080p ولكن الملحوظ هنا تفوق بسيط لصالح Samsung A02s في تصوير الفيديوهات وفي جودة لقط الصوت لأن السامسونج هو الوحيد الي فيه ميك إضافي لعزل الضوضاء.

شوف تجربة التصوير كاملة في فيديو المقارنة على قناة موبيزل على اليوتيوب

 

 

أسعار الموبايلات :-

  • سعر Realme C21 نسخة 64 جيجا مع 4 جيجا رام بسعر 2200 جنية
  • سعر Oppo A15 نسخة 32 جيجا مع 3 جيجا رام بسعر 2300 جنية
  • سعر Galaxy A02s نسخة 64 جيجا مع 4 جيجا رام بسعر 2200 جية

وينفع تركب كارت ميموري وشريحتين اتصال مع بعض في الـ 3 موبايلات .

الرأي النهائي :-

بالنسبة لـ Samsung Galaxy A02s فا هو أضعف موبايل فيهم .. معالج أقل وكاميرات مش حلوة خالص ومفيش بصمة وشبكات أضعف وشاحن ابطأ وشاشة ألوانها أقل .. الحلو اللي فيه هو الـType C وميكروفون اضافي.

موبايلات ريلمي و أوبو ممكن تكون اختيار أفضل شوية في الفئة السعرية دي .. طيب تشتري مين فيهم ؟

نقط تفوق Realme C21 على Oppo A15 :-

  • كاميرات أفضل بفرق واضح
  • المعالج أداءه أفضل
  • البطارية أكبر
  • تقدر تعمل نسختين من برامج التواصل الإجتماعي
  • مساحة و رام أكبر
  • سعر أقل

نقط تفوق Oppo A15 على Realme C21 :-

  •  في جراب في العلبة
  • الشاشة سطوعها أعلى وعليها سكرينة
  • السماعات مكانها أحسن وصوتها أعلى

أضف تعليقك